General

കോട്ടയം : മലങ്കര സഭകേസിൽ അന്തിമ വിധി ഉണ്ടായി നീണ്ട ഏഴു വർഷങ്ങൾ പിന്നിട്ടിട്ടും വിധി നടത്തിപ്പ് പൂർത്തീകരിക്കുവാൻ ശ്രമിക്കാത്ത സർക്കാർ നിയമസാധുതയില്ലാത്ത ഒരു സമൂഹത്തിന്റെ വക്താക്കളായി അധ:പതിക്കുന്നത് അംഗീകരിക്കുവാൻ സാധിക്കില്ല.
പതിറ്റാണ്ടുകൾ നീണ്ട വ്യവഹാരത്തിന് ഒടുവിലാണ് മലങ്കര സഭാ കേസിൽ ഒരു വിധിതീർപ്പുണ്ടാകുന്നത്. ആ വിധി നടത്തിയെടുക്കുവാൻ മലങ്കര സഭക്ക് എല്ലാ അവകാശവുമുണ്ട്. വിധി നടത്തിയെടുക്കുന്നതിന് എതിർ ഭാഗത്തു നിന്ന് എതിർപ്പുണ്ടായാൽ ആ എതിർപ്പുകളെ വ്യവസ്ഥാപിതമാർഗത്തിലൂടെ അതിജീവിക്കുവാൻ ഭരണകൂടങ്ങൾക്ക് വേണ്ട മാർഗനിർദ്ദേശങ്ങളും വിധിന്യായത്തിലുണ്ട്. എന്നിട്ട് പോലും ബഹുമാനപ്പെട്ട സുപ്രീംകോടതി വിധിയുടെ അന്തസത്തയെ ലഘുകരിച്ചു കാണുന്ന സർക്കാർ സമീപനം നീതിപൂർവമല്ല എന്നത് മാത്രമല്ല നിയമവിരുദ്ധ പ്രവർത്തനങ്ങൾക്ക് ആക്കം കൂട്ടുന്നതും കൂടിയാണ്.
യാക്കോബായ വിഭാഗം വിശ്വാസികൾക്ക് പോലും കോടതി വിധിയുടെ ഉള്ളടക്കം ബോധ്യപ്പെട്ടിട്ടും സർക്കാർ സംവിധാനങ്ങൾ ഒരിക്കലും ചെയ്തു കൂടാത്ത പക്ഷപാതിത്വം കാണിക്കുന്നത് പരിഷകൃത സമൂഹത്തിന് അപമാനകരമാണ്.

ഓർത്തഡോൿസ്‌ സഭ നിയമ മാർഗത്തിൽ മാത്രം അടിയുറച്ചുനിന്നാണ് ഇന്ന് വരെയുള്ള പോരാട്ടങ്ങൾക്ക് നേതൃത്വം കൊടുത്തത്. സഹിഷ്ണുതയോടും, ക്ഷമയോടും കൂടെ മലങ്കര സഭയുടെ ഉടമസ്ഥതയിലുള്ള പള്ളികൾ അന്യകൈവശത്തിൽ നിയമവിരുദ്ധമായി നിലകൊള്ളുന്നത് നിയമവിധേയമാക്കുന്നതിനു വേണ്ടിയുള്ള ശ്രമങ്ങൾ മലങ്കര ഓർത്തഡോൿസ്‌ സുറിയാനി സഭ നടത്തുമ്പോൾ സഭയിലെ വിശ്വാസികളെ കൊഞ്ഞനം കുത്തുന്ന സമീപനം സർക്കാർ ഉപേക്ഷിക്കണം എന്നാണ് ഓർത്തഡോൿസ്‌ ക്രൈസ്തവ യുവജന പ്രസ്ഥാനത്തിന് ആവശ്യപ്പെടുവാനുള്ളത്. സർക്കാർ യാക്കോബായ രഹസ്യബാന്ധവം മറനീക്കി പുറത്തു വന്നിരിക്കുന്നു.

ബഹുമാനപ്പെട്ട കേരള ഹൈക്കോടതി പരാമർശത്തിന് എതിരായിട്ട് ബഹുമാനപ്പെട്ട സുപ്രീം കോടതിയിൽ അപ്പീൽ നൽകുവാൻ കാണിക്കുന്ന ഉത്സാഹത്തിന്റെ മൂന്നിൽ ഒരംശം ബഹുമാനപ്പെട്ട സുപ്രീം കോടതിയുടെ അന്തിമവിധി നടപ്പാക്കുവാൻ കാണിച്ചിരുന്നെങ്കിൽ എത്രയോ മഹത്തരമായേനെ. കോടതി വിധി നടപ്പാക്കുമ്പോൾ അനീതി നടക്കുന്നു എന്ന വ്യാജ പ്രചരണങ്ങൾ പൊതുസമൂഹത്തിന്റെ മധ്യത്തിൽ ബോധപൂർവ്വം നടത്തുവാനുള്ള ശ്രമങ്ങൾ ആശങ്ക ഉണ്ടാക്കുന്നതാണ്.
കോടതി വിധി നടപ്പാക്കുമ്പോൾ പള്ളിയും, പള്ളിയുടെ അനുബന്ധങ്ങളും നിയമ വിധേയമാക്കിത്തീർക്കുകയാണ് ചെയ്യുന്നത്. ജനങ്ങൾക്ക്‌ പള്ളി നഷ്ടപ്പെടുന്നില്ല. ജനങ്ങൾക്ക്‌ ആരാധിക്കുവാനുള്ള ഒരു സ്വാതന്ത്ര്യവും ഹനിക്കപ്പെടുന്നില്ല. വ്യവസ്ഥാപിത ഭരണസംവിധാനത്തിൽ കൂടുതൽ തെളിമയോടെ ദേവാലയത്തിൽ വിശ്വാസികൾക്ക് ഇടപെടുവാനുള്ള അവസരമാണ് സൃഷ്ടിക്കപ്പെടുന്നത് എന്ന യാഥാർഥ്യം ബോധപൂർവ്വം മറച്ചുപിടിക്കാനും, ഇത് കൈയ്യടക്കി വച്ചിരിക്കുന്ന ഒരു ചെറിയ വിഭാഗത്തിന് വേണ്ടി കോടതി വിധി അട്ടിമറിക്കുവാനുമുള്ള ശ്രമങ്ങളാണ് നടക്കുന്നത് എന്നുള്ളത് ഞെട്ടിക്കുന്നതാണ്.
ഈ നീതിരഹിതമായ നീക്കത്തിൽനിന്നും സർക്കാർ പിന്മാറണം. ബഹുമാനപ്പെട്ട സുപ്രീംകോടതിയുടെ അന്തിമവിധി പൂർണമായി നടപ്പാക്കുവാൻ ബഹുമാനപ്പെട്ട കേരള സർക്കാർ തയ്യാറാകണമെന്ന് ഓർത്തഡോൿസ്‌ ക്രൈസ്തവ യുവജന പ്രസ്ഥാനം ആവശ്യപ്പെടുന്നു.
പ്രസിഡന്റ്‌ അഭിവന്ദ്യ. ഡോ. ഗീവർഗീസ് മാർ യൂലിയോസ് മെത്രാപ്പോലീത്ത, വൈസ് പ്രസിഡന്റ്‌ ഫാ ഗീവർഗീസ് കോശി, ജനറൽ സെക്രട്ടറി ഫാ വിജു ഏലിയാസ്, ട്രഷറർ ശ്രീ . പേൾ കണ്ണേത്ത് എന്നിവർപ്രസംഗിച്ചു.

54 ആം സംസ്ഥാന ചലച്ചിത്ര പുരസ്‌കാര ദാനത്തിൽ മികച്ച കഥാകൃത്തിനുള്ള സംസ്ഥാന അവാർഡ് കരസ്ഥമാക്കിയ ശ്രീ പോൾസൺ സ്‌കറിയാ
ചരിത്രപ്രസിദ്ധമായ പാമ്പാക്കുട സെന്റ് ജോൺസ് എഫേസോസ് ഓർത്തഡോക്സ് വലിയ പള്ളി അംഗവും പരിശുദ്ധ മദ്ബഹ ശുശ്രൂഷകനും ക്രൈസ്തവ യുവജന പ്രസ്ഥാനത്തിന്റെ സജീവ പ്രവർത്തകനുമാണ്… അഭിനന്ദനങ്ങൾ.

ദുരിത ബാധിതരൊടൊപ്പം ഒ സി വൈ എം

കോട്ടയം / വയനാട് : വയനാട് പ്രകൃതി ദുരന്തത്തിൽ മലങ്കര ഓർത്തഡോൿസ്‌ സുറിയാനി സഭ ക്രൈസ്തവ യുവജന പ്രസ്ഥാനം അടിയന്തിര എക്സിക്യൂട്ടീവ് സമിതി യോഗം ചേർന്ന് ദുരിത ബാധിതർക്ക് അടിയന്തിര സഹായം ചെയ്യുന്നതിനെക്കുറിച്ച് ചർച്ച ചെയ്തു. പരിശുദ്ധ കാതോലിക്കാ ബാവ യുടെ കല്പന അനുസരിച്ച് ബത്തേരി ഭദ്രാസനവുമായി ചേർന്ന് പ്രവർത്തനങ്ങൾക്ക് നേതൃത്വം നൽകുവാൻ യൂണിറ്റുകൾക്ക് നിർദേശം നൽകുവാൻ തീരുമാനിച്ചു. ദുരിത ബാധിതർക്ക് ശാശ്വതമായ പുനരധിവാസ പദ്ധതികൾ ആസൂത്രണം ചെയ്തു നടപ്പാക്കുവാൻ പ്രസിഡന്റ്‌ അഭിവന്ദ്യ ഡോ. ഗീവർഗീസ് മാർ യൂലിയോസ് മെത്രാപോലീത്ത നിർദ്ദേശിച്ചു.  പരിശുദ്ധ സഭയുടെയും പരിശുദ്ധ ബാവയുടെയും തീരുമാനങ്ങൾക്കും നിർദ്ദേശങ്ങൾക്കും വിധേയമായി മാത്രമായിരിക്കണം പ്രവർത്തനങ്ങൾ എകോപിപ്പിക്കേണ്ടത് എന്ന് പ്രസിഡന്റ്‌ തിരുമേനി അഭിപ്രായപ്പെട്ടു.  വയനാട്ടിൽ ദുരന്തമുഖത്ത് സന്നദ്ധ പ്രവർത്തനത്തിൽ പങ്കാളികളായിക്കൊണ്ടിരിക്കുന്ന ഫാ ബസിൽ,  ശ്രീ സനീഷ് എന്നിവർ കാര്യങ്ങൾ വിശദീകരിച്ചു.  ഫാ. ഷിജി കോശി, ഫാ വിജു ഏലിയാസ്, പേൾ കണ്ണേത്ത്,  റോബിൻ വർഗീസ്, നിഖിൽ ജോയി,  രെഞ്ചു എം ജെ, സജയ് തങ്കച്ചൻ എന്നിവർ പ്രസംഗിച്ചു.  ദുരന്തത്തിൽ മരണമടഞ്ഞവർക്ക് ആദരാഞ്ജലികൾ അർപ്പിച്ചു.  പ്രകൃതി ദുരന്തങ്ങളിൽ കൂടുതൽ ജാഗ്രത പാലിക്കുവാനും ത്വരിത ഗതിയിലുള്ള രക്ഷാപ്രവർത്തനത്തിനുള്ള സാഹചര്യം ഒരുക്കുവാനും അധികാരികളോട് യോഗം ആഹ്വാനം ചെയ്തു.  സഹായങ്ങൾ അർഹതപ്പെട്ടവരുടെ കൈകളിൽ തന്നെ എത്തുന്നുണ്ടെന്നു ഉറപ്പു വരുത്തുവാൻ ജാഗ്രത പുലർത്തണമെന്ന് യോഗം ആവശ്യപ്പെട്ടു.  ദുരന്തത്തിൽ നിന്ന് രക്ഷപെട്ടു ഒറ്റപ്പെട്ടു ജീവിതത്തിനുള്ള വഴിയടഞ്ഞിരിക്കുന്നവരുടെ കൃത്യമായ വിവരശേഖരണം നടത്തി അവരെ സ്വഭാവീക ജീവിതത്തിലേക്ക് തിരികെ കൊണ്ടുവരുവാനുള്ള കൂട്ടായ പരിശ്രമത്തിൽ കേരള സമൂഹമനസാക്ഷിയുടെ കൂടെ എന്നും ഓർത്തഡോൿസ്‌ ക്രൈസ്തവ യുവജന പ്രസ്ഥാനം സർവ്വസജ്ജമായി ഉണ്ടാകും എന്നും പ്രസിഡന്റ്‌ തിരുമേനി പ്രസ്താവിച്ചു. ബത്തേരി ഭദ്രാസന മെത്രാപോലീത്തായുമായി നിരന്തരം ആശയ വിനിമയം നടത്തുന്നുണ്ടെന്നും ഭദ്രാസനത്തിന്റെ നിർദ്ദേശം ലഭിച്ചാൽ അവിടെ എത്തുവാൻ താൻ സന്നദ്ധനാണെന്നും ഡോ ഗീവർഗീസ് മാർ യൂലിയോസ് മെത്രാപോലീത്ത പറഞ്ഞു.